మహారాష్ట్రలో ఘోర ప్రమాదం: ఆలయం పైకప్పు కూలి ఆరుగురి మృతి

మహారాష్ట్రలో ఘోర ప్రమాదం జరిగింది. పర్భణీ జిల్లాలోని ప్రసిద్ధ యశ్వాడి మారుతి ఆలయంలో నిర్మాణంలో ఉన్న సభా మండపం పైకప్పు కూలిపోవడంతో ఆరుగురు భక్తులు మరణించారు. మరో 40 మందికి పైగా తీవ్రంగా గాయపడ్డారు. శిథిలాల కింద ఇంకా చాలామంది చిక్కుకున్నారని, మృతుల సంఖ్య పెరిగే అవకాశం ఉందని అధికారులు ఆందోళన వ్యక్తం చేస్తున్నారు.

వివరాల్లోకి వెళితే, శనివారం సాయంత్రం 3:30 గంటల సమయంలో ఆలయంలో కీర్తన కార్యక్రమం జరుగుతోంది. ఈ కార్యక్రమానికి భక్తులు పెద్ద సంఖ్యలో హాజరయ్యారు. అదే సమయంలో రాజస్థానీ పింక్ స్టోన్స్, కాంక్రీట్ స్లాబులతో నిర్మిస్తున్న సభా మండపం ఒక్కసారిగా కుప్పకూలింది. దీంతో భక్తులు శిథిలాల కింద చిక్కుకుపోయారు.

సమాచారం అందుకున్న వెంటనే పోలీసులు, జిల్లా యంత్రాంగం సంఘటనా స్థలానికి చేరుకుని సహాయక చర్యలు ప్రారంభించారు. క్రేన్లు, ఇతర భారీ యంత్రాల సహాయంతో శిథిలాలను తొలగిస్తున్నారు. గాయపడిన వారిని అంబులెన్సుల ద్వారా సమీప ఆసుపత్రులకు తరలించారు. ప్రమాద స్థలానికి ప్రజలు గుంపులుగా రావొద్దని అధికారులు విజ్ఞప్తి చేశారు.

ఈ దుర్ఘటనపై ప్రధాని నరేంద్ర మోదీ, మహారాష్ట్ర ముఖ్యమంత్రి దేవేంద్ర ఫడ్నవీస్ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలిపారు. రాష్ట్ర ప్రభుత్వం మృతుల కుటుంబాలకు రూ. 5 లక్షల చొప్పున పరిహారం ప్రకటించింది. నిర్మాణంలో నాణ్యతా లోపాల వల్లే ఈ ప్రమాదం జరిగిందా అనే కోణంలో విచారణ జరిపే అవకాశం ఉంది.